قصه سحر التفريق (كامله)

سحر التفريق

الجزء الاول

هبدأ كلامي وهقولكم أنا مين.. أنا حمزة سلام عبد الوهاب.. سني دلوقتي 25 سنة.. عايش مع أمي في القاهرة.. أنا صاحب مطعم مشويات فخم في القاهرة

والحمد لله عايش كويس.. حالتي الاجتماعية خاطب وعلي وش جواز

وهحكيلكم دلوقتي انا حصل معايا اي.. بس حاولوا تستوعبوا اللي هحكيه

…

القصة بتبدأ من 30 سنة.. اه بالظبط قبل ما أنا أتولد من الاساس.. بدأت في الصعيد وتحديدا في أسيوط

مع عيلة أسمها عيلة السكري.. عيلتي أيوة أنا حفيد عيلة السكري وانا اللي فاضل من العيلة يعتبر مع كام واحد من العيلة سنهم كبر ومش فاكرين حتي هما مين!

عيلة السكري في الوقت ده كانت من أغني عائلات الصعيد.. عندهم ثروة تشتري بلد بحالها ده غير الاراضي

والعقارات

جدي السكري كان هو أكبر واحد في العيلة كان العمدة بتاع البلد أيامها.. الكل بيعمله حساب مش خوف منه لا أحترام ليه.. كان دايما بيحكم بالعدل بين الناس ومحبوب

وكان عنده 4 عيال… مصطفى وكامل وصفية وحنان

حنان دي أمي.. أطيب أنسانة في الدنيا كلها

طيب يعني معني كده.. أن جدي ده يبقي والد أمي مش أبويا.. وأكيد بتسأل فين عيلة أبويا؟

…

هجاوبك جواب هيصدمك شوية.. عيلة ابويا اتقتلت كلها.. اه زي ما سمعت كده.. ادبحوا واحد واحد

مين اللي قتلهم وليه؟ ركز في اللي جاي عشان تفهم الحكاية

..

في الوقت اللي بحكيلكم فيه ده.. أنا قاعد قدام أمي وهي علي فراش الموت.. وادتني جواب وبعد ما قريته هحكيلكم الحكاية

الموضوع بدأ لما أتصاب جدي السكري بجلطة في المخ وساعتها بدأ الجحود يظهر في العيلة.. والكل بقا سيرته الميراث.. هو لو مات هيقسمه بشرع ربنا ولا لا

خالي مصطفى كان هو أقرب واحد لجدي من ناحية الشغل والمحبة.. وكان هو اللي بيدير أموال جدي، عشان كده الكلام كتر في حتة أن جدي اكيد مميز خالي مصطفى عن الباقيين وكاتبله حاجة زيادة.. محدش كان بيفكر في جدي اللي مرمي في المستشفى بين الحياة والموت غير أمي حنان كانت دايما جمبه في المستشفى ومكنش هاممها الميراث ولا اي حاجة من الكلام ده

…

لكن الأقدار خالفت كل الظنون.. وجدي فاق من الجلطة دي واسترد عافيته والحمد لله.. لكن المشكلة انه عرف حقيقة اللي حواليه.. عرف انه العيلة كلها باستثناء أمي كانوا بيتكلموا في موضوع الورث وهو لسه حي يرزق

الموضوع ده اثر في نفسية جدي فعلاً وخلاه كاره التعامل معاهم والقعدة معاهم

ودايما كان قاعد لوحده ورافض أنه يكلم حد

وفي يوم الكل صحي علي صراخ جدي السكري محدش كان عارف في اي؟

جريوا علي أوضته وحاولوا يفتحوها مرة واتنين لحد ما اتفتحت.. جدي كان علي السرير وبياخد نفسه بالعافية

وبمجرد ما شافهم اخد نفسه بصعوبة وأتكلم وقال

_ أي اللي جابكم هنا.. أنا مش قولت أني مش عايز أشوف حد فيكم؟ أنتوا اي مش بتفهموا.. أطلعوا بره.. بره

أستني أنتي يا حنان.. والكل يطلع بره

..

الكل لاحظ معاملة جدي السكري لأمي.. وانها مميزة عن غيرها وعشان كده أمي بدأت تتكره والقرب منها يكون بخباثة عشان يعرفوا جدي قالها اي

لكن اللي قالوا جدي لأمي.. كان كابوس.. كابوس مفزع خلي جدي مرعوب وخايف.. والكابوس ده كان عبارة عن أرض متغطية بالدم.. الارض دي كانت ارض البيت وجثث العيلة كلها مرمية علي الارض وعلي بعد خطوات تعبان دهبي اللون.. واقف وبيترقب في حد لسه عايش

المنظر كان صعب.. خلي جدي يقوم مفزوع من نومه ويصرخ بالشكل ده

وطلب جدي من أمي انها متحكيش الكابوس ده لأي حد وفضل يفكر مين المقصود بالتعبان اللي شافه في الكابوس؟

..

في الوقت ده كانت أمي في اخر سنة في الثانوية العامة وجابت مجموع كويس ورغم كده هي اختارت تدخل كلية تربية قسم تاريخ عشان كانت عاوزة تكون مدرسة بالرغم من أن مجموعها فى الوقت ده كان جايب اعلي من كده.. ووافق جدي على طلب أمي بالرغم ان تنسيقها مجاش في اسيوط زي ما كان متوقع.. جيه في القاهرة ورغم اعتراض اخواتها علي سافرها القاهرة لوحدها لكنها ركبت دماغها وصممت على ده بمساعدة جدي اللي كان داعم لأمي في الخطوة دي

وفعلا سافرت أمي القاهرة وقعدت في شقة هناك ملك لجدي السكري.. عشان تبدأ دراستها في جامعة القاهرة كلية التربية قسم التاريخ

..

وفي يوم نزل جدي الشغل علي غير عادته.. اه نسيت اقولكم ان جدي كان بيمتلك محل عطارة كبير وليه فروع في كل محافظات مصر.. لما نزل الشغل وقابل المحاسب أكتشف ان خالي مصطفى ساحب فلوس كتير جداً الفترة اللي فاتت بدون علم جدي.. وده اللي خلي جدي هيتجنن وحس ان أبنه بيسرقه بالرغم انه مش مخليهم محتاجين حاجة

رجع جدي البيت وهو الغضب متحكم فيه لكن اكتشف ان خالي مصطفى مغير عربيته وجايب عربية موديل السنة.. وده اللي خلاه ينفجر في خالي مصطفى لا ومش كده وبس.. ده طرد خالي مصطفى من البيت

محدش كان متخيل ان الامور هتوصل لكده

…

وفي القاهرة كانت أمي متعرفش حاجة عن الكلام ده كانت مركزة في دراستها وعاوزة تحقق كريرها.. وفي الوقت ده ظهر أبويا في الصورة.. أبويا المهندس سلام كان بيدرس الهندسة في الجامعة.. شاف أمي وهي رايحة الكلية اعجب بيها من أول نظرة وحبها

بس لما عرف انها من الصعيد اتردد يكلمها.. وخاف من رد فعلها خصوصا ان العادات والتقاليد تختلف هنا عن هناك

لكنه اخد القرار وقرر يكلمها ويقولها انه عايز يدخل البيت من بابه.. أمي لما سمعت كلامه بان عليها الكسوف والخجل

وعشان هو مهندس ومستقبله مضمون.. وافقت أمي ومش عشان كده وبس لا

أبويا سلام كان شاب وسيم طول بعرض واي بنت تتمناه

..

أمي ادت لسلام عنوان البيت في اسيوط.. وقالتله

_ لو أنت قد كلامك فعلاً.. يبقي هستناك الجمعة الجاية في بيت ابويا تاجي تطلبني منه

وفعلا رجعت أمي حنان البلد.. ورغم اللي عرفته عن اخوها مصطفى وان جدي طرده.. لكن ده مفرقش معاها وقالت لجدي علي الشاب اللي عايز يتقدملها

وفعلا علي يوم الجمعة كان سلام واهله في بيت جدي عشان يطلبوا أمي حنان.. بصراحة امي مرتحتش أبداً لحماتها وشافت في عينيها نظرة الحسد والطمع لكن في النهاية هي هتتجوز ابنها.. مش هتتجوزها هي

وطلب جدي فرصة للتفكير في الموضوع

ومشي سلام واهله

وفي اليوم ده شافت أمي كابوس صعب.. شافت نفس ارض البيت اللي حكالها عنها جدي وغرقانة دم بس المرة دي شافت جدي قاعد علي كرسي وواحد واقف وراه وبيدبحه.. والدم مغرق الارض وفجأة… يتبع الجزء التاني

…